Diesque tardus, sentiat canum litem, Abigatque moto noxias aves panno; Nec finiantur, morte simplices poenae: Sed modo severi sectus Aeaci loris, Nunc inquieti monte Sisyphi pressus, Nunc inter undas garruli senis siccus, Delasset omnes fabulas poetarum: Et, cum fateri Furia iusserit verum, Prodente clamet conscientia, Scripsi.
63. Some Farms are not worth the Price of a Dinner.
Donasti, Lupe, rus sub urbe nobis: Sed rus est mihi maius in fenestra. Rus hoc dicere, rus potes vocare, In quo ruta facit nemus Dianae, Argutae tegit ala quod cicadae, Quod formica die comedit uno, Clausae cui folium rosae corona est: In quo non magis invenitur herba, Quam costi folium, piperve crudum: In quo nec cucumis iacere rectus, Nec serpens habitare tota possit ? Erucam male pascit hortus unam; Consumto moritur culex salicto; Et talpa est mihi fossor atque arator. Non boletus hiare, non mariscae Ridere, aut violae patere possunt. Fines mus populatur, et colono Tanquam sus Calydonius timetur, Et sublata volantis ungue Procnes In nido seges est hirundinino; Et cum stet sine falce mentulaque, Non est dimidio locus Priapo. Vix implet cochleam peracta messis, Et mustum nuce condimus picata. Errasti, Lupe, litera sed una: Nam quo tempore praedium dedisti, Mallem tu mihi prandium dedisses.
Qui nondum Stygias descendere quaerit ad undas, Tonsorem fugiat, si sapit, Antiochum. Alba minus saevis lacerantur brachia cultris, Cum furit ad Phrygios enthea turba modos; Mitior implicitas Alcon secat enterocelas, Fractaque fabrili dedolat ossa manu. Tondeat hic inopes Cynicos et Stoica menta, Collaque pulverea nudet equina iuba.
Hic miserum Scythica sub rupe Promethea radat: Carnificem nudo pectore poscet avem.
Ad matrem fugiet Pentheus, ad Maenadas Orpheus: Antiochi tantum barbara tela sonent.
Haec quaecunque meo numeratis stigmata mento, In vetuli pyctae qualia fronte sedent, Non iracundis fecit gravis unguibus uxor: Antiochi ferrum est, et scelerata manus.
Unus de cunctis animalibus hircus habet cor: Barbatus vivit, ne ferat Antiochum.
65. A Family Migration.
O Iuliarum dedecus Kalendarum, Vidi, Vacerra, sarcinas tuas; vidi: Quas non retentas pensione pro bima Portabat uxor rufa crinibus septem, Et cum sorore cana mater ingenti. Furias putavi nocte Ditis emersas. Has tu priores frigore et fame siccus, Et non recenti pallidus magis buxo Irus tuorum temporum sequebaris. Migrare clivum crederes Aricinum. Ibat tripes grabatus, et bipes mensa, Et cum lucerna corneoque cratere Matella curto rupta latere meiebat. Focum ferentis suberat amphorae cervix: Fuisse gerres, aut inutiles maenas Odor impudicus urcei fatebatur, Qualem marinae misit aura piscinae. Nec quadra deerat casei Tholosatis.
Quadrima nigri nec corona pulei, Calvaeque restes allioque cepisque, Nec plena turpi matris olla resina, Summoenianae qua pilantur uxores. Quid quaeris aedes, villicosque derides, Habitare gratis, o Vacerra, cum possis? Haec sarcinarum pompa convenit ponti.
66. The Poet's Apology for the late Appearance of his Book.
Scio me patrocinium debere contumacissimae triennii desidiae: quae absolvenda non esset inter illas quoque occupationes urbicas, quibus facilius consequimur, ut molesti potius quam officiosi esse videamur: nedum in hac provinciali solitudine, ubi nisi etiam intemperanter studemus, et sine solatio, et sine excusatione secessimus. Accipe ergo rationem; in qua hoc maximum et primum est, quod civitatis aures, quibus assueveram, quaero, et videor mihi in alieno foro litigare. Si quid est enim in libellis meis, quod placeat, dictavit auditor. Illam iudiciorum subtilitatem, illud materiarum ingenium, bibliothecas, theatra, conventus, in quibus studere se voluptatibus non sentiunt: ad summam omnium ea, quae delicati reliquimus, quasi destituti desideramus. Accedit his municipaliuni rubigo dentium, et iudicii loco livor, et unus aut alter mali, in pusillo loco multi, adversus quos difficile est habere quotidie bonum stomachum. Ne mireris igitur abiecta ab indignante, quae a gestiente fieri solebant. Ne quid tamen et advenienti tibi ab urbe, et exigenti negarem, (cui non refero gratiam, si tantum ea praesto, quae possim,) imperavi mihi, quod indulgere consueveram, et studui paucissimis diebus, ut familiarissimas mihi aures tuas exciperem adventoria sua. Tu velim ista, quae tantum apud te non periclitantur, diligenter aestimare et excutere non graveris; et, quod tibi difficillimum est, de nugis nostris iudices nitore seposito, ne Romam, si ita decreveris, non Hispaniensem librum mittamus, sed Hispanum. Mart., Epig., xii.
Ingenium velox, audacia perdita, sermo Promtus, et Isaeo torrentior. Ede, quid illum Esse putes: quem vis hominem, secum adtulit ad nos:
Grammaticus, rhetor, geometres, pictor, aliptes. Augur, schoenobates, medicus, magus: omnia novit Graeculus esuriens: in caelum iusseris, ibit.
Ad summam, non Maurus erat neque Sarmata nec Thrax, Qui sumsit pennas, mediis sed natus Athenis. Quid, quod adulandi gens prudentissima laudat Sermonem indocti, faciem deformis amici, Et longum invalidi collum cervicibus aequat Herculis, Antaeum procul a tellure tenentis, Miratur vocem angustam, qua deterius nec Ille sonat, quo mordetur gallina marito. Haec eadem licet et nobis laudare: sed illis Creditur. An melior, quum Thaida sustinet, an, quum Uxorem comoedus agit, vel Dorida nullo Cultam palliolo? Mulier nempe ipsa videtur. Nec tantum Antiochus, nec erit mirabilis illic Aut Stratocles, aut cum molli Demetrius Haemo: Natio comoeda est. Rides? maiore cachinno Concutitur: flet, si lacrumas conspexit amici, Nec dolet: igniculum brumae si tempore poscas, Accipit endromiden: si dixeris "aestuo," sudat. Iuv., iii. 73-80, 86-95, 98-103.
Ebrius ac petulans, qui nullum forte cecidit, Dat poenas; noctem patitur lugentis amicum Pelidae, cubat in faciem, mox deinde supinus. Somnum rixa facit. Sed quamvis improbus annis Atque mero fervens, cavet hunc, quem coccina laena Vitari iubet, et comitum longissimus ordo, Multum praeterea flammarum et aënea lampas: Me, quem luna solet deducere vel breve lumen Candelae, cuius dispenso et tempero filum, Contemnit. Miserae cognosce prooemia rixae, Si rixa est, ubi tu pulsas, ego vapulo tantum. Stat contra starique iubet: parere necesse est. Nam quid agas, quum te furiosus cogat et idem Fortior? "Unde venis?" exclamat: "cuius aceto, Cuius conche tumes? quis tecum sectile porrum Sutor et elixi vervecis labra comedit?
Nil mihi respondes? Aut dic, aut accipe calcem! Ede, ubi consistas: in qua te quaero proseucha?"
Dicere si tentes aliquid, tacitusve recedas, Tantumdem est; pariter feriunt: vadimonia deinde Irati faciunt. Libertas pauperis haec est: Pulsatus rogat, et pugnis concisus adorat, Ut liceat paucis cum dentibus inde reverti.
69. Cruelty of the Roman Ladies towards their Maids.
Praefectura domus Sicula non mitior aula.
Nam si constituit solitoque decentius optat Ornari, et properat, iamque exspectatur in hortis, Aut apud Isiacae potius sacraria lenae; Componit crinem laceratis ipsa capillis
Nuda humeros Psecas infelix, nudisque mamillis. "Altior hic quare cincinnus?" Taurea punit Continuo flexi crimen facinusque capilli.
Quid Psecas admisit? quaenam est hic culpa puellae, Si tibi displicuit nasus tuus? Altera laevum Extendit pectitque comas et volvit in orbem. Est in consilio matrona, admotaque lanis, Emerita quae cessat acu: sententia prima Huius erit: post hanc aetate atque arte minores Censebunt, tamquam famae discrimen agatur Aut animae; tanta est quaerendi cura decoris. Tot premit ordinibus, tot adhuc compagibus altum Aedificat caput. Andromachen a fronte videbis: Post minor est: aliam credas. Cedo, si breve parvi Sortita est lateris spatium, breviorque videtur Virgine Pygmaea, nullis adiuta cothurnis, Et levis erecta consurgit ad oscula planta?
Atque ego a maioribus memoria sic accepi: si quis quid alter ab altero peterent, si ambo pares essent, sive boni sive mali essent, quod duo res gessissent, uti testes non interessent, illi, unde petitur, ei potius credendum esse. Nunc si sponsionem fecissent Gellius cum Turio: ni vir melior esset Gellius, quam Turius, nemo, opinor, tam insanus esset, qui iudicaret, meliorem esse Gellium, quam Turium; si non melior Gellius est Turio, potius oportet credi unde petitur. Aul. Gell., XIV. ii.
« IndietroContinua » |