C. C. SALLUSTII BELLUM GATILINARIUM, SIVE DE CONJURATIONE CATILINAE EJUSQUE SOCIORUM. 1. OMNIS MNIS homines, qui sese student præstare ceteris animalibus, summâ ope niti decet vitam silentio ne transeant, veluti pecora, quæ natura próna atque ventri obedientia finxit. Sed nostra omnis vis in animo et corpore sita: animi imperio, corporis servitio, magis utimur. Alterum nobis cum dîs, alterum cum belluis, commune est. Quò mihi rectius videtur ingenii quàm virium opibus gloriam quærere, et, quoniam vita ipsa quâ fruimur brevis est, memoriam nostri quàm maxumè longam efficere. Nam divitiarum et formæ gloria fluxa atque fragilis; virtus clara æternaque habetur. Sed diu magnum inter mortalis certamen fuit, vine corporis, an virtute animi, res militaris magis procederet. Nam et, priùs quàm incipias, consulto, et, ubi consulueris, maturè facto, opus est. Ita utrumque, per se indigens, alterum alterius auxilio veget. |