P. VIRGILII MARONIS

GEORGICA.

LIBRI PRIMI ARGUMENTUM.

GEORGICA, Seu de re rustica præcepta, arationem, arborum, vitium imprimis et olearum, culturam, pastionem et mellificium, e Romanorum notione complectuntur. Ordinem dicendorum ducit propositio et argumentum operis (v. 1-5). Inde invocatio numinum agrestium cum ipso Cæsare Augusto (5-42). Tum de prima operis rustici parte, quæ est de aratione, exponit: ac primum quidem, quando illa incipienda sit (43-49). Ante omnia cœli solique natura est exploranda (50–63), unde leges culturæ diversæ proficiscuntur, imprimis arationis (64—99) et sationis (100-117). Quum in his multum laboris et ærumnæ tolerandum sit, digreditur ad causas hujus rei mythicas inde a Saturni ætate [et exponit, quomodo impedimentis agriculturæ post auream illam ætatem obortis occurrendum sit.] (118—159). Inde de instrumento rustico (160-175); tum de aliis ad opus rusticum faciendum curandis, in his de area ad terenda grana paranda (176-186); judicium de futuro anni proventu unde facere liceat (187-192); de semine medicando (193–196); de seminum delectu faciendo (197-203). Sequitur locus de temporibus operum rusticorum diserte tractatus. Tempus sationis (204-230). Digressio de solis cursu annuo et quatuor anni tempestatibus (231-256). Quæ curanda sint tempore pluvio (257-267); diebus festis (268-275). Dierum lunarium, qui fausti vel infausti sint, observatio (276-286); nonnulla noctu melius tractanda (287–296); alia per calorem aëris (297—299); alia hieme (300-310). Ita viam sibi parat ad duas anni tempestates poëtica arte describendas, alteram auctumni, alteram veris